Rusiye ordusı gece 131 ücüm dronunı qullanaraq, Ukrainağa ücüm etti, dep haber etti Ukrayina Silâlı quvetleriniñ Ava quvetleriniñ komandanlığı.
Arbiyler, Rusiye ordusı Brânsk, Kursk, Orl, işğal etilgen Donetsk ve Qırımdaki Sarabuz qasabası yönelişlerinden "Shahed" tipli dronlarnı, şu cümleden reaktiv dronlarnı, "Gerbera", "Italmas" ve "Parodiya" tipli dron imitatorlarını uçurğan.
"İlk malümatqa köre, saat 8-de ava mudafaası tarafından duşmannıñ 107 BPLA-sı urıp tüşürildi/bastırıldı", — dep aytıla bildirmede.
Komandanlıq doquz yerde 16 ücüm dronu urulğanını ve altı yerde yıqıntılarnıñ tüşüvini qayd etti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.