Rusiye Federatsiyası Devlet dumasınıñ deputatları oktâbrniñ 3-nde ötkerilgen planlaştırılmağan umumiy toplaşuvda Rusiyeniñ Donetsk, Zaporijjâ, Lugansk, Herson ve Mıkolayıv vilâyetiniñ bir qısmını ilhaq etüv vesiqalarını tasdıqladı. Bunıñ içün dört anayasa qanunı qabul etildi, şimdi olarnı Rusiye Federatsiyasınıñ Federatsiya Şurası qabul etmeli ve Rusiye prezidenti Vladimir Putin imzalamalı.
Rusiye Federatsiyasınıñ Devlet duma deputatları imzalanğan vesiqanı alğışlarnen qarşıladı, dep bildire Rusiye devlet kanalları. Haber derc etilgende rey bergenlerniñ cedveli daa aydınlatılmadı.
Vesiqağa köre, Ukrayınanıñ Donetsk ve Lugansk vilâyetleri Rusiyege Donetsk ve Lugansk halq cumhuriyetleri olaraq 2014 senesiniñ memuriy sıñırlarında qabul etildi. Herson ve Zaporijjâ vilâyetleriniñ sıñırları vesiqada aytılmay. Mıkolayıv vilâyetiniñ bir qısmı Herson vilâyetiniñ erkânındadır.
2023 senesi iyünniñ 1-ne qadar regionlarda federal akimiyet organlarınıñ bölüklerini qurmağa planlaştırıla, altı ay devamında şeer ve belediye okruglarını yapmağa tırışalar. Bu topraqlarda işğalciler tarafından şekillendirilgen silâlı quvetler ve arbiy birleşmelerni Rusiye ordusına ve diger ordularğa kirsetmege teklif etile, dep bildire Rusiye Federatsiyasınıñ Devlet duma saytı.
Kyiv ve Ğarp memleketleri ilhaqnı iç bir şekilde qabul etmeycekler, dep ilân ettiler. Rusiye qanunlarına köre Rusiyede artıq 89 federatsiya subyekti bar. Bugün işğal etilgenlerden ğayrı daa altı danesi daa evel işğal etilgen Qırım ve Aqyar çoqusı dünya memleketi tarafından qabul etilmey.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
