Kütleviy haber vastalarında ve Telegram kanallarında Rusiye prezidenti Vladimir Putinniñ yılbaş hayırlavı videosını derc ettiler. Televideniyede onı başta Rusiyeniñ şarqiy regionlarınıñ sakinlerine kösterdiler, anda 2026 senesi ertece başladı.
TASS agentligi Putin çıqışınıñ tolu metnini derc etti. Büyük qısmı "mahsus arbiy operatsiya" (Rusiyede Ukrayinağa qarşı cenkni böyle adlandıralar – QA) iştirakçilerine bağışlana. Putin olarnı "aqiqat ve adalet içün cenkleşken qaramanlar" dep adlandırdı. O, Rusiye vatandaşlarını olarğa "söznen ve amelnen" qoltutmağa çağırdı, bu yılbaş gecesi "millionlarnen insan" askerlernen beraber "ğalebege işana" dep aytqanını bildirdi. Çıqışında barışıq aqqında aytılmadı.
Rusiye sakinlerini Putin "küçlü ve birlik bir qoranta" dep adlandırıp, olarnı "anane, işanç ve tarihiy hatıra" birleştire, dep qayd etti. O, "ileri ketmege ve qoyulğan maqsadlarğa irişmege çağırdı".
Ukrayina prezidenti Volodımır Zelenskıy içtimaiy ağlarda yañı 2026 senesi hayırlavını derc etti. O, ukrayinalılarnıñ metanetini ve er kün yapqan işini, hususan arbiylerni qayd etti. Kelecek yıl ukrayinalılar yanına "işbirligi yapmaq qabiliyetini ve insanlığını ala", dep ayttı. "Barışıqqa inanamız, onıñ içün küreşemiz ve onıñ içün çalışamız", – dep yazdı Zelenskıy.
2026 senesi Putinniñ emrinen 2022 senesi fevral ayında başlağan Ukrayinada büyük cenkniñ beşinci yılı olacaq. Yılbaş bayramlarında cenk areketleri toqtamay. Putin yılbaş muracaatlarında 2022 senesi dekabr ayından berli arbiyler aqqında ayta, lâkin bu yıl olarğa eskisinden daa çoq vaqıt ayırıldı.
