Rusiye ordusı noyabrniñ 5-ne keçer gecesi (noyabrniñ 4-nden saat 18:00-den başlap) Qara deñizden eki H-35 idare etilgen aviatsiya raketası ve farqlı yönelişlerden, hususan Rusiye işğal etken Qırımdan 128 darbe uçucısızınen (65-i – reaktiv) ücüm etti, dep haber ete Ukrayina Silâlı quvetleriniñ Ava küçleriniñ matbuat hızmeti.
İlk malümatqa köre, saat 08:00-ge qadar ava mudafaası Shahed (olardan 48-i – reaktiv), Gerber, diger dronlar olğan 105 Rusiye uçucısızını zararsız alğa ketirdi, bir qaç darbe uçucısızı daa avada qala – uruş işi devam ete.
Ukrayina arbiyleri 18 yerde duşmannıñ ava ücüm vastasınıñ darbesini qayd etti, 9 yerde urulğan parçalar tüşti.
Kyiv vilâyetinde Rusiye ücümi sebebinden anbarda yanğın çıqtı, Devlet fevqulâde vaziyetler hızmeti yanğınnı söndürmek içün qoşma küçler celp etti.
Gece Rusiye uçucısızları Dnipro ve Samarğa ücüm etti. Yerli akimiyetniñ malümatına köre, üç kişi yaralandı, kritik infrastruktura obyektlerinde yanğınlar çıqtı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.