Ukrayina Silâlı quvetleriniñ Ava küçleri bildirgenine köre, avgustnıñ 6-na keçer gecesi Rusiye ordusı Ukrayinağa eki "Oniks" gemilerge qarşı raketası, eki X-31P radiolokatsion küreş raketası ve 101 uçucısıznen ücüm etti. "Oniks" raketaları ve dronlarnıñ bir qısmı Qırımdan uçurıldı.
İlk malümatqa köre, saat 09:00-ğa qadar Ukrayina ava mudafaası memleketniñ şimali, cenübi ve şarqında Shahed, Gerber, Italmas ve diger dronlar olğan 66 Rusiye uçucısızını zararsız alğa ketirdi.
Ukrayina arbiyleri 18 yerde 29 darbe uçucısızı ve bir "Oniks" raketasınıñ darbesini, 5 yerde parçalar tüşkenini qayd etti.
Qalğan raketalar maqsadına irişemedi, malümat alına.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.