Rusiye arbiyleri iyulniñ 29-na keçer gecesi Ukrayinağa 80 darbe uçucısızınen ücüm etti. Olarnı Rusiyeden, işğal etilgen Donetskten ve Qırımnıñ Sarabuz qasabasından uçurdılar, dep bildirdi Ukrayina Silâlı quvetleriniñ Ava küçleri.
"İlk malümatqa köre, saat 08:00-ge qadar ava mudafaası memleketniñ şimali, cenübi ve şarqında Shahed, Gerber, Italians ve diger dronlar olğan 65 duşman uçucısızını urdı/bastırdı", – dep aytıla haberde.
Ava küçleriniñ malümatına köre, 10 yerde 14 darbe uçucısızınıñ darbesi, eki yerde parçalarnıñ tüşkeni qayd etildi.
Arbiyler ücüm devam ete, Ukrayinanıñ ava boşluğında Rusiye dronları daa bar, dep tenbiledi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.