İyulniñ 17-ne keçer gecesi Rusiye arbiyleri işğal etilgen Qırımdan Ukrayinağa bir X-31P radiolokatsion raketasınen ve em Rusiyeden, em işğal etken topraqlarından, hususan Qırımdaki Sarabuz qasabasından uçurılğan yedi H-59/69 idare etilgen aviatsiya raketasınen ücüm etti, dep bildire Ukrayina Silâlı quvetleriniñ Ava küçleri.
"İlk malümatqa köre, saat 08:00-ge qadar ava mudafaası memleketniñ şimali, cenübi ve şarqında beş H-59/69 aviatsiya raketasını ve Shahed, Gerber ve Italmas ve diger dronlar olğan 115 duşman uçucısızını urdı ya da bastırdı. Yedi yerde eki raketa ve sekiz darbe uçucısızınıñ ücümi ve beş yerde urulğan parçalarnıñ tüşkeni qayd etildi. Bundan ğayrı, H-31P radiolokatsion raketası maqsadına irişemedi", – dep bildire Ukrayina arbiyleri.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.