Rusiye arbiyleyeri iyulniñ 6-na keçer gecesi Ukrayinağa darbe uçucısızları, ava, yer ve deñizden raketalarnen ücüm etti, umumen 68 raketa ve 361 uçucısız uçurıldı, dep bildirdi Ukrayina Silâlı quvetleriniñ Ava küçleri.
Haberge köre, darbeniñ esas yönelişi Kyiv oldı. Ava küçleri Rusiye arbiyleriniñ silâsını qayd etti:
- altı 3M22 "Tsirkon"/"Oniks" gemilerge qarşı raketası;
- 23 "İskander-M/S-400" ballistik raketası;
- 33 X-101 qanatlı raketası;
- altı "Kalibr" qanatlı raketası;
- 351 darbe uçucısızı.
"İlk malümatqa köre, saat 08:30-ğa qadar ava mudafaası 363 nişannı urdı/bastırdı – 37 raketa ve 326 uçucısız: 31 X-101 qanatlı raketası; altı "Kalibr" qanatlı raketası; 326 çeşit uçucısız", – dep aytıla haberde.
Ukrayina Silâlı quvetleri Ava küçleriniñ malümatına köre, ilk malümatqa köre, saat 08:30-ğa qadar 29 ballistik (hususan gemilerge qarşı) raketa ve 34 yerde 18 darbe uçucısızı, 16 yerde dron parçalarınıñ tüşkeni qayd etildi.
Şeer akimiyetiniñ soñki malümatına köre, Kyivde bugünki ücüm neticesinde 11 insan elâk oldı, 46 yaralandı. Eki rayonda çoq qatlı binalar zarar kördi, yıqıntılar toplanmağa devam ete.
Ukrayina prezidenti Volodımır Zelenskıy istihbarat Rusiyeniñ Ukrayinağa qarşı yañı kütleviy darbe azırlağanını köstere, dep tenbilegen edi. Onıñ fikirince, "bu Putinniñ tarzı – Amerikanıñ Mustaqillik kününden soñ ve Ankarada NATO sammiti ögünde".
Soñki aftaları Rusiye Ukrayina vatandaş rayonlarına qarşı, hususan Kyivge qarşı ücümlerini quveyetleştirdi.
Keçken büyük ücüm vaqtında, iyulniñ 2-ne keçer gecesi, akimiyetniñ malümatına köre, Kyivde 31 insan elâk oldı, yüzden ziyade kişi yaralandı.
Bugünki darbe ABD prezidenti Donald Trump Ukrayina ve Rusiye prezidentleri Volodımır Zelenskıy ve Vladimir Putinnen ayrı telefon subetlerini keçirgen eki künden soñ oldı.
Darbeler Ankaradaki NATO sammiti ögünde endirildi, Zelenskıy anda Trumpnen körüşip, ABDniñ Rusiyeniñ Ukrayinağa qarşı büyük istilâsı ile küreşte Ukrayinağa destegini saqlap qalmağa tırışacaq.