Rusiye arbiyleri aprelniñ 8-ne keçer gecesi (aprelniñ 7-nde saat 18:00-den başlap) Ukrayinağa 176 darbe uçucısızınen ücüm etti, tahminen 120-si – Shahedler, dep bildirdi Ukrayina Silâlı quvetleriniñ Ava küçleri telegramda. Haberge köre, dronlar Rusiyede beş yönelişten ve Rusiye işğal etken Qırımda Çavda burnundan uçurıldı.
İlk malümatqa köre, saat 8:00-ge qadar Ukrayina Silâlı quvetleriniñ Ava mudafaası memleketniñ şimali, cenübi ve şarqında Shahed, Gerber, Italmas ve diger 146 Rusiye uçucısızını zararsız alğa ketirdi.
Ukrayina arbiyleri 12 yerde 24 darbe uçucısınıñ ücümini, bir yerde parçalarnıñ tüşkenini qayd etti.
Yerli akimiyetniñ malümatına köre, Rusiye ordusı gece Odesa vilâyetiniñ cenübine tekrar darbe uçucısızlarınen ücüm etti – vatandaş ve liman infrastrukturası zarar kördi.
Dnepropetrovsk vilâyetiniñ arbiy memuriyeti haber etkenine köre, gece duşman vilâyetniñ üç rayonına 20 kereden ziyade tor, uçucısız ve raketalarnen ücüm etti. Pavlograd rayonında Rusiye quvetleri Ternovkağa darbe endirdi – müessise zarar kördi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.