Rusiye fevralniñ 12-nde gece Ukrayinağa 25 raketa ve 219 darbe dronınen ücüm etti, bir qısmı işğal altındaki Qırımdan uçurıldı, dep haber ete Ukrayina Silâlı quvetleriniñ Ava küçleriniñ komandanlığı cumaaqşamı sabası.
Ukrayina arbiyleriniñ malümatına köre, Rusiye ordusı bularnı qullandı:
- Brânsk, Voronej, Rostov vilâyetleri ve işğal etilgen Qırımdan 24 "İskander-M"/S-300 ballistik raketası
- Donbasnıñ işğal etilgen qısmından X-59/69 idare etilgen aviatsiya raketası
- Kursk, Orel, Millerovo, Brânsk, Primorsko-Ahtarsk, Şatalov ve işğal etilgen Qırımnıñ Sarabuz qasabasından 219 Shahed, "Gerber", İtalmas ve digerleri.
Darbeniñ esas yönelişleri Kyiv, Harkiv, Dnipro ve Odesa oldılar, dep qayd ete Ukrayina Silâlı quvetleriniñ Ava küçleri.
Komandanlıq umumen 213 nişannıñ bastırılğanı ya da yoq etilgeni aqqında bildire: 15 "İskander-M"/S-300 ballistik raketası, H-59/69 raketası ve 197 Rusiye dronı.
"9 raketa ve 19 darbe uçucısızınıñ 13 yerde ücüm etkeni qayd etildi, 14 yerde parçalar tüşti", – dep aytıla haberde.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.