Ukrayina Silâlı quvetleriniñ ava küçleri saat 9:00-ğa qadar Rusiye ücüm etken 57 Shahed darbe uçucısızı ve diger uçucısızlarnıñ urıp tüşürilgenini tasdıqladı.
Bu ava nişanları Poltava, Sumı, Harkiv, Kyiv, Çerniğiv, Çerkası, Jıtomır, Hmelnitskıy, Donetsk, Dnipropetrovsk ve Zaporijjâ vilâyetlerinde urıp tüşürildi. Ukrayina Mudafaa Quvetleriniñ faal qarşılığı sebebinden 56 Rusiye imitator dronı da yerinde ğayıp oldı (menfiy aqibetsiz).
Ukrayina Silâlı Quvetleri Ava küçleriniñ malümatına köre, dekabrniñ 21-ne keçer gecesi (dekabrniñ 20-si saat 19:00-dan başlap) duşman Donetsk vilâyetiniñ işğal etilgen toprağından Poltava vilâyetiniñ tarafına S-400 zenit idare etilgen raketasını attı, 113 Shahed dronınen ve dronlarnıñ başqa çeşitlerinen Brânsk, Millerovo, Orel, Kursk, Primorsko-Ahtarsk, Berdânsk yönelişlerinde ücüm etti.
Zaporijjâ ve Harkiv vilâyetlerinde tüşürilgen ücüm uçucısızları mustaqil ve çoq daireli evlerge zarar ketirdi, yaralanğanlar da oldı.
Rusiye arbiyleri muntazam sürette çeşit silâ çeşitleri ile ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
