Rusiye ordusı saba Ukrayınağa qarşı büyük raketa ücümini kerçekleştirli. Qanatlı, aerobalistik, ballistik, aviatsiya, zenit idare etilgen raketalar ve darbe uçucısızları qullanıldı. Bu aqta Ukrayına Silâlı quvetleriniñ komandanlığı bildirdi.
Umumen arbiyler 40 ava ücüm vastasını qayd etti:
- Belgorod vilâyetinden uçurılğan yedi dane S-300/S-400 zenit idare etilgen raketası.
- Rusiyeniñ Kursk vilâyetinden üç dane Shahed-136/131
- Tambov rayonından MiG-31K altı uçağından «Kinjal» H-47M2 altı aerobalistik raketası
- Hazar deñizi rayonından 11 dane Tu-95MS strategik bombardımanından 12-ge qadar H-101/H-555/H-55 qanatlı raketası
- Brânsk vilâyetinden Tu-22M3 bombardımanlarından 6 dane H-22 qanatlı raketası
- İşğal etilgen Herson vilâyetinden eki Su-35 uçağından 2 H-31P idare etilgen aviatsiya raketası
- Eki Su-34 uçağından 4 idare etilgen H-59 aviatsiya raketası
- Ukrayına ava mudafaa quvetleri yedi dane H-101/555/55 qanatlı raketası ve H-59 aviatsiya raketasını yoq etti.
«Qayd etemiz ki, tüşürilgenler sırasına kirmegen 20-den çoq ava ücüm vastası radioelektron küreş vastalarınıñ faal areketi neticesinde maqsadına irişemedi! Bundan ğayrı, «beñzeri olmağan» Rusiye raketaları ket-kete daa fena ola ve añlaşılmağan yerlerge kete!», – dep qayd etti komandanlıq.
Aynı vaqıtta, arbiyler telüke eksilmedi, dep qayd ete, şunıñ içün vatandaşlardan ava telükesi signalını körmemezlikke urmamağa, hususan ballistik raketalar olğanda, çağıra.
Rusiye ordusı yanvarniñ 13-nde saba Ukrayınağa qarşı daa bir raketa ücümini kerçekleştirdi. Ava telükesi bir qaç vilâyette ilân etildi, Ukrayına Ava quvetleriniñ komandanlığı «Kinjallarnen» beraber çeşit raketalar aqqında tenbiledi.
Yerli akimiyetniñ malümatına köre, Sumı vilâyetiniñ bir sakini yaralandı, Dniprodaki darbe aqibetleri ögrenile.
Dekabrniñ soñundan başlap Rusiye Ukrayınağa qarşı raketa ateşlerini quvetleştirdi. Rusiye quvetleriniñ soñki büyük ücümi vaqtında yanvarniñ 8-nde 4 insan elâk oldı, daa 38 kişi yaralandı. Ukrayına Silâlı quvetleriniñ Ava küçleri hususan Qırımdan qanatlı ve ballistik raketalar uçurıldı, dep bildirdi. Ukrayınanıñ bir çoq şeerinde patlavlar ve ava mudafaa quvetleriniñ işi aqqında haber etildi.
Ukrayına Silâlı quvetleriniñ malümatına köre, Rusiye arbiyleri yanvarniñ 8-nde saba Ukrayınağa qarşı 51 raketanı uçurdı, 18-ini urıp tüşürgenler.
Rusiye arbiyleri işğal altındaki Ukrayına topraqlarını, şu cümleden mülkiy obyektlerni muntazam sürette ateşke tuta. Delillerge baqmadan, Moskva bu darbelerniñ maqsadı Ukrayınanıñ arbiy infraterkibi olğanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
