Rusiyeniñ Brânsk vilâyetiniñ valisi Aleksandr Bogomaz iyülniñ 31-ne keçer gecesi region uçucısızlarnıñ ücümine oğradı, dep bildirdi.
Başta o, Trubçevskte polis binasına dron tüşti, dep bildirdi. Onıñ aytqanına köre, yaralanğanlar yoq, camlar ve dam zarar kördi. Soñra Bogomaz Lomakovka köyüne ateş açıldı, dep bildirdi – kimse yaralanmadı, dört ev ve eki maşina zarar kördi. Bogomaz bu ücümlerde Ukrayınanı qabaatladı.
Rostov vilâyetindeki Daraganovkada uçucısız tüşkenini regionnıñ valisi Vasiliy Golubev haber etti. Neticede maşina yandı, bir evniñ damı yandı ve alev qomşu evge keçti. Golubevniñ aytqanına köre, yaralanğanlar yoq. 161.ru Rostov neşiriniñ malümatına köre, yanğınnı özü söndürgen yerli sakin yañıq aldı.
Golubev dronnıñ kimge ait olğanı teşkerile, dep bildirdi. Rusiye arbiy Telegram kanalları uçucısız Rusiyege ait ola bile, dep tahmin ete: parçaları «Forpost» ya da «Orion» soylarına oşay.
Rusiyeniñ Ukrayınağa qarşı büyük istilâsınıñ ekinci yılında Rusiye regionları muntazam sürette ücümlerge oğray, binalar zarar köre, insanlar yaralana. Akimiyet ücümler Ukrayına tarafından yapıla, dep bildirdi. Kyiv bu malümatnı izaatlamay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
