Rusiye arbiyleri sentâbrniñ 22-ne keçer gecesi Ukrayinağa hususan Rusiye işğal etken Qırımnıñ Sarabuz qasabasından raketa ve dronlarnen ücüm etti. Bu ücüm neticesinde 22 yerde raketa ve darbe uçucısızlarınıñ darbesi, dört yerde parçalarnıñ tüşkeni qayd etildi, dep bildirdi Ukrayina Silâlı quvetleriniñ Ava küçleri.
Arbiyler bildirgenine köre, Rusiye quvetleri darbe vaqtında sayısı aytılmağan "Oniks" gemilerge qarşı raketaları, "İskander-M"/S-400/KN-23 ballistik raketaları, "Kalibr" dört qanatlı raketası, sekiz "Banderol"/"Dan-T2 ve 212 Shahed ve "Parodiya" taqlit dronını qullandı.
Darbeniñ esas yönelişi – Dnipropetrovsk, Kirovoğrad ve Poltava vilâyeti, dep bildire Ava küçleri.
"İlk malümatqa köre, saat 08:00-ge qadar ava mudafaası 186 nişannı urdı/bastırdı: 1 "Kalibr" qanatlı raketası; 8 "Banderol"/"Dan-T"; 177 Shahed, "Gerber" ve diger dronlar… Ücüm devam ete, ava boşluğında duşman uçucısızları bar", – dep qoştı Ukrayina Silâlı quvetleri.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.