Rusiye ordusı avgustnıñ 21-ne keçer gecesi Ukrayina ve Moldova sıñırındaki "Tabaki" maşina keçiş noqtasına ücüm etti. Kontrol-keçiş noqtasınıñ binaları ve inşaatları zarar kördi, dep bildirdi Ukrayina Devlet sıñır hızmeti. Bu keçiş noqtasından maşina ve insanlarnıñ kirsetilüvi toqtatıldı. Darbe aqibetleriniñ fotoresimleri derc etildi:
Berilgen malümatqa köre, "Şahed" uçucısızları gece Odesa vilâyetiniñ Bolgrad ve İzmail rayonlarına ücüm etti.
Ukrayina prezidenti Volodımır Zelenskıy Moldova keçiş noqtasına qarşı ücüm aqqında bildirdi. Ukrayina Devlet sıñır hızmetiniñ malümatına köre, dronlardan biri keçiş noqtası yanında yük maşinalarına tüşti. Yaralanğan ve elâk olğanlar olmadı. Keçiş noqtasınıñ işi vaqtınca toqtatıldı, amma soñra işini ğayrıdan tikledi. Angi keçiş noqtası aqqında aytıla haber etilmey.
Umumen Rusiye ordusı avgustnıñ 21-ne keçer gecesi Ukrayinağa 135 uçucısı uçurdı, olardan 107-sini Ukrayina quvetleri tüşürdi, dep bildirdi Ukrayina Silâlı quvetleriniñ Ava küçleri. Mustaqil malümat yoq.
Darbeler Sumı ve Harkiv vilâyetine endirildi. Sumı vilâyeyetiniñ arbiy memuriyet yolbaşçısı Oleg Grigorov Rusiyeniñ Sumı şeerine qarşı gece ücümi vaqtında altı yaralanğan insan aqqında bildirdi. Yaralanğanlar arasında – 16 yaşında genç qız. Grigorovnıñ aytqanına köre, bütün yaralanğanlar – uçucısız ücüm etken eki qatlı ev sakinleri.
Rusiye arbiyleri gece Harkiv vilâti Çuguyev rayonınıñ Lebâjye köyüne ücüm etti, eki insan elâk oldı, daa eki kişi yaralandı. Ukrayina Devlet fevqulâde vaziyetler hızmetiniñ malümatına köre, mesken evler viran etildi ve zarar kördi, bazılarında yanğın çıqtı, maşinalar da yandı.