Ukrayina ve Rusiye arasında Cenk esirlerini deñişüv vaqtında 261 Ukrayinalı cenk esiri azat etildi, dep haber ete Cenk esirlerinen munasebet koordinatsion ştabı.
"Bundan ğayrı, 9 adiy vatandaş vatanğa qaytıp oldı. Bu, avgustnıñ 19-nda başlağan esir deñişüviniñ üçünci etapıdır", – dep aytıla haberde.
Ukrayina Silâlı quvetleri Arbiy-deñiz küçleri, Qara ordusı, Desant-ücüm ordusı, Devlet mahsus naqliyat hızmeti, territorial mudafaa, Mahsus operatsiyalar quvetleri, Arbiy nizam hızmeti, Ukrayina Milliy gvardiya arbiyleri, Devlet sıñır hızmetiniñ arbiyleri ve Devlet fevqulâde vaziyetler hızmetiniñ qurtarıcısı azat etildi.
Ukrayina ştabı bildirgenine köre, azat etilgen arbiylerniñ yarısından ziyadesi 2022 senesi esir alındı, hususan Mariupol imayesi vaqtında. Beşi 2022 senesi iyul ayında Olenivkadaki patlavda edi. Daa doquz kişi ağır hasta.
"Umumen Donetsk, Lugansk, Harkiv, Zaporijjâ, Herson, Kyiv, Mıkolayıv ve Çerniğiv yönelişlerinde cenk etkenler ve Çernobıl atom elektrik stantsiyasınıñ imayecileri qayta", – dep qoşa Koordinatsion ştab.
Azat etilgenlerniñ büyük qısmı Rusiye tarafından taqip etildi ve "halqara uquqqa zıt bir şekilde uydurılğan qabaatlavlarnen farqlı apis cezalarına, ömür boyu apis cezalarına üküm etildi". Azat etilgenlerni tibbiy baquv, tedaviylev ve reabilitatsiya bekley.
Prezident Volodımır Zelenskıy bugün 270 insannıñ azat etilüvini "müim bir netice" dep adlandırdı:
"Deñişüv içün çalışqan er keske minnetdarım. Ve, ebet, bizimkilerni qaytara bilmemiz içün cebede Ukrayina içün deñişüv fondunı toldurğan askerlerimizge minnetdarım.
Evelki esir deñişüvi avgustnıñ 24-nde, Ukrayina Mustaqillik kününde, oldı, o vaqıt ğayıp olğan sayılğan 10 arbiy azat etildi.
İyün ayında Cenk esirlerinen munasebet koordinatsion ştabı bildirgenine köre, dört yılda 9609 Ukrayina vatandaşı evge qaytarıldı – arbiyler ve adiy vatandaşlar.