Çerkası vilâyetiniñ Uman şeerinde Rusiyeniñ raketa ücümi neticesinde 9 qatlı mesken ev zarar kördi, daa 3 insannıñ cesedleri çıqarıldı, dep bildire Ukrayına İç işler nazirliginiñ matbuat hızmeti.
Böylece elâk olğanlarnıñ sayısı 14 oldı. Şeerde üç künlik matem ilân etildi.
Ukrayına Baş prokurorınıñ ofisi prokurorlar Rusiye ücüminiñ aqibetlerini qayd ete, cenk qanunları ve adetlerini bozuvnen bağlı mahkemeden evelki tahqiqat başlatıldı.
Nazir İğor Klımenko raketa tüşken evde 27 daire «bütünley yoq etildi», dep bildirdi.
Aprelniñ 28-nde saba Rusiye ordusı Ukrayınağa ücüm etti. Çerkası vilâyetiniñ Uman şeerinde raketa doquz qatlı binağa tüşti. 10 insan elâk oldı, eñ az 18 kişi yaralandı. Adise yerinden kelgen videolarğa köre, evde eñ az bir kiriş yıqıldı.
Dnipro şeerinde raketalar mustaqil evge ücüm etti. Eki insan elâk oldı – eki yaşında qızçıq ve 31 yaşında qadın. Üç kişi yaralandı, dep haber ete Dnipropetrovsk vilâyetiniñ arbiy memuriyeti.
Ukrayına Silâlı quvetleriniñ malümatına köre, ava mudafaa quvetleri 23 qanatlı raketadan 21-sini ve eki dronnı yoq etti.
Ukrayına Tış işler nazirligi Dmıtro Kuleba ücümlerden soñ ğarbiy ortaqlarını Kyivge F-16 zemaneviy uçaqlarını bermesine çağırdı.
Ukrayına prezidenti Volodımır Zelenskıy qayd etkenine köre, «Rusiye terrorı» Ukrayına ve dünyadan adaletli bir cevap almaq kerek ve alacaq.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
