Bu aqta Qırımtatar Milliy Meclisiniñ reisi Refat Çubarov mart 1-3 künleri Antaliyada (Türkiye) keçken diplomatik forumda ''İnterfaks-Ukrayina'' agentligine bergen izaatında bildirdi.
''Rusiye Federatsiyasınıñ ukrayin siyasiy mabüslerine nisbeten munasebetini deñiştirüv noqta-i nazarından müsbet signallar yoq, yazıq. Olar bu mevzuda laf etmek ıntıluvlarnı red eteler", - dep qayd etti o.
Çubarovnıñ aytqanına köre, Ukrayina Türkiyedeki ükümran firqanıñ reberligi ile Qırım siyasiy mabüsleriniñ meselelerini muzakere etti.
"Bazı vaqıtları bizler, akimiyet siyasetçileriniñ işğal etilgen Qırımda, hususan, siyasiy mabüsler ile olğan dramatik vaziyetni añlamalarını arttırmaq içün, türk partiya mehanizmlerini qullanamız", - dep añlattı Meclis reisi.
O şunı da qoştı ki, ukrayin eyyeti siyasiy mabüsler mevzusını ükümran türk firqasınıñ baş kâtibiniñ muavini ile muzakere etti.
Daa evel "Qırım uquq qoruyıcı gruppasınıñ" reisi Olğa Skrıpnık, eñ azından 193 Ukrayina vatandaşı siyasiy sebeplerden apishanede tutula, dep bildirdi. Hususan, olarnı Qırım SİZO-sında ya da Rusiye topraqlarında bulunğan koloniyalarda tutalar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
