Rusiyeniñ OSCE-deki daimiy temsilcisi Aleksandr Lukaşeviç noyabrniñ 4-nde OSCE Daimiy şurasınıñ oturışı vaqtında, Moskva OSCE-niñ Milliy azlıqlarnıñ meselelerinden yuqarı komissar Kayrat Abdrahmanovnıñ Ukrainada qabul etilgen tamır halqlar aqqında qanun "em tamır halqlar, em de bütün cemiyet içün semereli alet olacağı" ile bağlı "ümütleri ile aynı fikride degil", dep bildirdi.
"Tekrarlaymız, söz eksterritrial olğanına iddia etken ve türlü etnik gruppalar içün teñ olmağan siyasiy ve uquqiy vaziyetni köz ögünde tutqan soñ derece nahoş qanun aqqındadır. Memleketeniñ rustilli ealisi tesir altından çıqarılğan desek olacaq. Aynı zamanda Kyiv "bölgeniñ mahsus statusı çersivesinde Donbas sakinleri özü til saylap olğanı aqqında unuta", - dedi Lukaşeviç.
Ukrainada iyülniñ 23-nde Tamır halqlar qanunı işke tüşürildi. Vesiqa «Ğolos Ukrayını» («Ukrainanıñ sesi») gazetasında derc etildi.
Ukraina prezidenti Volodımır Zelenskıy iyülniñ 21-nde Yuqarı Rada 2021 senesi iyülniñ 1-nde qabul etken «Ukrainanıñ tamır halqları» №1616-IX qanunını imzaladı.
Qayd etilgenine köre, vesiqanıñ maqsadı tamır halqlarnıñ medeniy, informatsion ve diger aqlarını qorumaq, olarğa Ukraina devleti ile iş mehanizmlerini ve aletlerini bermek ola. Hususan, tamır halqlarnıñ temsiliy organları tanıla.
Qanun qırımtatarlar, qaray ve qırımçaqlar Qırım yarımadasında şekillengen Ukrainanıñ tamır halqları ola, dep belgilemekte.
Qırımtatarlarnı tamır halq olaraq tanıma
2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil etmekte. Qırımtatar Milliy Meclisi ve Qurultayı qırımtatarlarnıñ temsiliy organları olaraq tanıldı.
Er yıl avgustnıñ 9-nda dünya tamır halqlar künü qayd etile. Onı BM Baş Assambleyası 1994 senesi tasdıqladı.
