Rusiye arbiyleri Ukrainağa qarşı «Kinjal» giperdavuşlı raketa komplekslerini qullanğanını bildirdi. Bu aqta martnıñ 19-nda Rusiye Mudafaa nazirliginiñ resmiy vekili İgor Konaşenkov bildirdi.
«Martnıñ 18-nde gipersesli aerobalistik raketalı «Kinjal» aviatsiya raketa kompleksinen İvano-Frankivsk vilâyetindeki Delâtın meskün yerinde Ukraina ordusınıñ büyük yerastı raketaları ve aviatsiya silâsı yoq etildi», – dep ayttı Konaşenkov brifingde.
«Kinjal» – tam gipersesli aerobalistik raketalı aviatsiya kompleksidir. O, zemaneviyleştirilgen uzaq qırıcı MiG-31 – MiG-31K bazasında yapıldı. Rusiye arbiyleriniñ aytqanına köre, o, bütün mudafaa ve raketalarğa qarşı sistemalarını keçip, 2 biñ kilometrden çoq mesafede nişanğa yete bile.
Rusiye arbiyleriniñ ilk haberlerine köre, Rusiyeniñ Cenübiy arbiy okrugındaki tecribe-uruş nevbetçiliginde 10 «Kinjal» MiG-31K qırıcısı buluna. 2018 senesi aprel ayından berli olar Hazar deñizinde nevbetçilik yapa.
Ukraina tarafı Rusiye Mudafaa nazirliginiñ beyanatını şimdilik izaatlamadı.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
