Rusiyede muhalifet siyasetçileri, medeniyet erbapları, alim ve jurnalistler Rusiye ordusınıñ Ukrainağa ücüm etüvini acele toqtatmaq çağıruvınen narazılıq aktsiyalarına çıqa.
Cenk ile küreş aktsiyalarına Sibir şeerleriniñ sakinleri çıqtı. Bir çoqunı polis tuttı, dep bildire Sibir.Realii mühbirleri.
Omskta şeerniñ farqlı skverlerinde faal Mihail Melnikov ve «Omsk vatandaş birleşmesiniñ» iştirakçisi Dmitriy Grunin narazılıq aktsiyalarına çıqtı.
Faalniñ aytqanına köre, o, tecavuzcı memleketniñ bir qısmı olmağa istemegeni içün narazılıq aktsiyasına çıqtı. Gruninniñ fikirince, Ukraina ile cenk tek Ukraina içün facia olmaycaq. O, «zaten pek az alâmeti qalğan Rusiye iqtisadiyatı içün baştaş olıp», devletniñ siyasiy izolâtsiyasına ketirecek.
Faal başqa devlette yapılğan arbiy areketler aqqında haberlerni rusiyelilerniñ bir qısmı entuziazm ile qarşıladı, dep şikâyet etti.
Narazılıq aktsiyasına çıqqan Mihail Melnikovnıñ aytqanına köre, «bu epimiz içün soñsuz bir masharalıq, biz Putinni toqtatamadıq. Cevap berecekmiz», – dep ayttı narazılıqmı Sibir.Realii neşirine. Narazılıq aktsiyası vaqtında Melnikovnı polis hadimleri tuttı.
İrkutskta faaller Pavel Haritonenko ve Natalya Moskina İrkutsk vilâyeti memuriyetiniñ binası ögünde narazılıq aktsiyasına çıqtı. Soñra Haritonenko polis hadimleri tarafından tutuldı ve polis bölügine ketirildi, dep bildirdi muarririyetke faal. Tutuluv sebebini oña aytmadılar.
İrkutsklı aq qorçalayıcı, «Ust-Kut 24» yolbaşçısı Aleksey Tupitsin ve neşirniñ muarririyeti Ukrainağa qarşı Rusiye tecavuzına qarşı çıqtı. «Cenk olmasın! Men Putin rejiminiñ cinayetlerinde iştirak etmeyim», – dep yazdı yazuvlı şiarda Tupitsin.
