Birleşken Milletler Teşkilâtında Ukraina daimiy reisiniñ muaviniñ temsilcisi Oleğ Nikolenko, Rusiye, ukrain til qanunı sebebinden BMT-niñ Telükesizlik şurasınıñ oturışını çağırtacaq oldı, dep bildirdi.
"Yaqında bizni BMT-niñ Telükesizlik şurasında absurd teatriniñ ekinci perdesi bekley. Rusiye delegatsiyası, Ukraina til qanunını muzakere etmek içün ekinci sefer BMT-niñ Telükesizlik şurasına muracaat etti. Bugün bu ay yapılacaq iş programmasını tayinlegende, böyle oturışnı iyül 16-sına belgiledir", - yazdı Facebook saifesinde Nikolenko, dep bildire Azatlıq Radiosı.
Onıñ aytqanına köre, şekliy sebep - qanunnıñ quvet alğanı.
"Amma ep bir episi añlay - Moskovanı til qanun kederletmey, o, Ukrainada vaziyetni turğunsızlaştırmaq içün er bir imkânnı qullana. BMT-de Ukraina delegatsiyası, til qanunı - devletimizniñ iç meselesi olğanını bir qaç kere qayd ete edi. Telükesizlik şurasınıñ oña iç bir alâqası yoq. Öz tarafından Ukraina, oturışnı, Rusiye-Ukraina davasınıñ zaruriy meselelerini muzakere etmek içün qullanacaq: birinciden ukrain deñizcilerniñ ve siyasiy mabüslerniñ azat etilmesini, Donbassta devam etken atuvlarnı ve Rusiyeniñ MH17 uçaq qazası içün mesuliyetligini", - dep qoştı Oleğ Nikolenko.
Daa evel Rusiye ukrain til qanunını muzakere etmek içün mayıs 20-sinde BMT Telükesizlek şurasınıñ oturışını keçirmek içün teşebbüs köstergen edi. Amma o vaqıt Telükesizlek şurası bu meseleniñ baqıluvını red etti.
Mayıs 15-inde Ukrainanıñ beşinci prezidenti Petro Poroşenko qanunnı imzaladı. Ertesi künü o resmiy matbuatta derc etilgen edi.
