Rusiyeniñ Penza şeerinde uçucısızlarnıñ ücümi vaqtında raketa-kâinat tehnikası içün donatma yapqan AO "Fizikiy ölçüvler ilmiy-tedqiqat institutına" (NİİFİ) darbe endirildi, dep yaza ASTRA leyhası OSINT-talili neticelerine esaslanıp.
Talilcilerniñ malümatına köre, yerli sakinler derc etken video yerleri ücüm etilgen obyektlerden biri NİİFİ olğanını köstere. Levhalardan biri "Globus" abidesi yanında, digeri – Kirov soq., 62 adresindeki Rusiye Federatsiyası Merkeziy bankınıñ binası ögünde çıqarıldı.
Penza vilâyetiniñ valisi Oleg Melniçenko uçucısızlarnıñ regionğa qarşı ücümini tasdıqladı. Başta dron parçaları elektrik hatlarına zarar ketirdi ve qurulğan binağa tüşti, dep bildirdi. Soñra Penza uçucısız ücümine oğrağanını aytıp, "ilk malümatqa köre, elâk olğanlar ve yaralanğanlar yoq", dep qayd etti.
NİİFİ raketa-kâinat tehnikası içün datçik, donatma ve diagnostika sistemalarını azırlay, yapa ve teşkerip baqa. Müessise "Roskosmos" devlet şirketine ait "Rusiye kâinat sistemaları" holdingine kire.
Muarririyetniñ bu malümatnı mustaqil menbalarda teşkermek imkânı yoq. Ukrayina arbiyleri dronlarnıñ Penza darbesini şimdilik izaatlamadı.
Rusiyeniñ büyük istilâsı başlağan soñ Rusiyede ve işğal etken Ukrayina topraqlarında çeşit obyektler ava darbelerine oğray.
Ukrayina Silâlı quvetleriniñ Baş ştabı ücümlerniñ çoqusını tasdıqlap, Ukrayina Mudafaa quvetleri "Rusiye işğalci ordusınıñ cenk imkânlarını eksiltmek ve Rusiyeni Ukrayinağa qarşı silâlı istilâsını toqtatmasına mecbur etmek içün muntazam sürette tedbir ala", dep bildirgen edi.