Rusiye ordusı Ukrayinağa gece 135 darbe dronınen ücüm etti, dep bildirdi Ukrayina Silâlı quvetleriniñ Ava küçleri komandanlığı avgustnıñ 21-nde saba.
Ukrayina arbiyleriniñ malümatına köre, uçucısızlar ve taqlitçiler Rusiyeniñ Kursk, Millerovo, Orel, Primorsk-Ahtarsk şeerlerinden ve işğal etilgen Donetsk ve Qırımdan uçurıldı.
"İlk malümatqa köre, saat 08:00-geye qadar ava mudafaası memleketniñ şimali, cenübi ve şarqında Shahed, Gerber ve diger dronlar olğan 107 duşman uçucısızını urdı/bastırdı", – dep aytıla haberde.
Komandanlıq 16 yerde 27 darbe dronınıñ ücümini, üç yerde parçalar tüşkenini qayd etti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.