Rusiye arbiyleri iyünniñ 18-ne keçer gecesi Ukrayinağa yedi "İskander-M"/S-400 ballistik raketası ve 239 darbe uçucısızınen ücüm etti, bir qısmı işğal etilgen Qırımda Sarabuz qasabasından uçurıldı, dep bildirdi Ukrayina Silâlı quvetleri Ava küçleri.
"İlk malümatqa köre, saat 08:00-ge qadar ava mudafaası 216 nişannı urdı/bastırdı: memleketniñ şimali, cenübi ve şarqında dört "İskander-M"/S-400 ballistik raketası ve Shahed, "Gerber", "İtalmas" ve diger dronlar olğan 212 duşman uçucısı", – dep aytıla haberde.
Ava küçleri haber etkenine köre, doquz yerde eki ballistik raketa ve 26 darbe uçucısızınıñ darbesi ve yedi yerde parçalarnıñ tüşkeni qayd etildi. Daa bir ballistik raketa malümatı teşkerile, dep ayta arbiyler ve ücüm devam ete, Ukrayinada Rusiye uçucısızları bar, dep tenbiley.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.