Rusiye Federatsiyası tarafından kontrol etilgen Aqmescitniñ Kiyev rayon mahkemesi «Hizb ut-Tahrir» davasınıñ mabüsleri Emir Kurtnezirov, Abibulla Smetlâyev, Rustem Mustafayev, Mırzaali Tajibayev ve Bahtiyar Ablayevniñ apis müddetini uzattı. Olar 2025 senesi iyülniñ 4-ne qadar SİZOda tutulacaq, dep haber ete «Qırım birdemligi».
Qayd etilgenine köre, apiske alınğanlardan üçü oturışuvda yoq edi, çünki mahkeme-psihiatrik ekspertizadan keçe – olarnı hastahaneden ketirmediler, dep haber etti advokat Edem Semedlâyev.
«Mabüslerni mahkemege ketirmemege imkân bergen qanunğa köre, olar esnasta iştirak etip olamadı ve fikrini bildiremedi», – dep bildire imayeciniñ aytqanlarını «Qırım birdemligi».
Advokat apis cezasınıñ uzatıluvına qarşı itiraz etip, tahqiqatnıñ böyle bir sıñırlav tedbiri içün sebepleri yoq, dep bildirdi. Lâkin mahkeme advokatlarnıñ delillerine qulaq asmadı.
Fevralniñ 5-nde saba işğal etilgen Qırımnıñ Canköy ve İslâm Terek rayonlarında tintüvler keçirildi, beş qırımtatarınıñ tutulğanı belli oldı. Apiske alınğanlar arasında – imam Remzi Kurtnezirovnıñ oğlu Emir, çağına yetmegen dört balanıñ babası Abibulla Smetlâyev, santehnik Rustem Mustafayev, Mırzaali Tacıbayev ve Bahtiyar Ablayev.
FSB hadimleri episini Aqmescitke tahqiqat tedbirleri içün alıp ketti. Rusiye qurğan Aqmescitniñ Kiyev rayon mahkemesi tutulğanlardan üçüni 2025 senesi aprelniñ 4-ne qadar nezaret altına aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
