Rusiye TİN yolbaşçısı Sergey Lavrov Qırımnıñ ilhaq etilüvini 1990 senesi Ğarbiy ve Şarqiy Almaniyanıñ qavuşmasınen qıyasladı. Bunı o, 2021 senesi Rusiye diplomatiyası faaliyetiniñ neticelerine bağışlanğa matbuat konferentsiyası vaqtında bildirdi.
"Memleketimizniñ almanlarnıñ birleşmesini desteklegenini unutmamalılar ve almanlar Qırımda yaşağan ruslarnıñ (ealiniñ ekseriyeti) de öz vatanları ile birleşmek aqqı bar olğanını añlamalılar, hususan olarğa qarşı neonatsist şiarları, "Qırımdan yoq oluñız" şiarları ile boyevikler yollanğan zaman. Ümüt etem ki, Almaniyada şimdiki Ğarp ittifaqdaşlar Almaniyanıñ qavuşması ile pek şübelengenlerini unutmağandırlar", - TASS Rusiye agentligi Lavrovnıñ aytqanlarından alıntı ketire.
Evel Sergey Lavro BMT Baş Assambleyasınıñ 76-nci sessiyası vaqtında Gapr memleketelerini "Qırım sakinleriniñ öz muqadderatını tayin etüv aqqını bozmaqta" qabaatladı.
2014 senesi martnıñ 27-sinde BMT Baş Assambleyası Ukraina topraq bütünligi aqqında qarar qabul etti.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
