Rusiye TİN yolbaşçısınıñ muavini Mahail Galuzin Ukrayina ile cenkni toqtatmaq içün eñ az altı şartnı ayttı. Olardan biri - Ukrayina "arbiy areketlerni toqtatmaq" kerek eken. Bunı o, TASS Rusiye agentligine intervyü berir eken bildirdi.
Galuzinniñ sözlerine köre, "vaziyetniñ al etilmesi içün" tirenüvden red etmekten ğayrı Ukrayina daa Ğarptan kelgen silâlardan red etmeli. "Ertaraflı, adaletli ve qaviy" barışıq içün Ukrayina NATO ve Avropa Birliginiñ azası olmamalı, "yañı territorial kerçekni" qabul etmeli, rus tilini devlet tili kibi tanımalı ve esas insan aqlarına, şu cümleden din serbestligi aqqına riayet etmeli.
Ukrayina prezidenti Volodımır Zelenskıy, cenkniñ bitmesiniñ yekâne şartı Rusiye ordusınıñ Ukrayina topraqlarından çıqarılması olğanını defalarca degen edi.
Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
