Rusiye mahkemeleri 2025 senesi 2078 insannı terrorizmde qabaatlı dep tanıdı. Bu bir yıl evelsi olğan raqamdan eki qat ziyade ve 1996 senesi şimdiki Rusiye Ceza kodeksi qabul etilgeninden maksimum oldı. Böyle malümatnı "Pervıy ötdel" aq qorçalayıcı leyhası Parubets Analytics talilcilerinen beraber derc ete. 2024 senesi bu maddelerge istinaden 1021 insan mahküm etildi.
Rusiye Yuqarı mahkemesi yanındaki mahkeme departamenti 2025 senesiniñ resmiy statistikasını derc etmey. "Pervıy ötdel" açıq menbalarnıñ malümatlarını topladı – mahkeme kartları, müessiselerniñ matbuat relizleri ve media yazıları. Leyha esaplarına köre, bir yılda mahkemeler eñ az 1776 üküm çıqardı.
Mahkümler terrorizmge çağırğanında, aqlağanında ya da propagandasında qabaatlandı. 2078 insandan 889-ı, aman-aman er ekincisi öyle oldı.
Eñ az 630 mabüsniñ Ukrayina vatandaşlığı bar edi, bu umumiy sayıdan aman-aman üçte biri ola. Olarnıñ arasında cenk esirleri ve barışıqsever insanlar bar. "Memorial" aq qorçalayıcı 929 mabüsniñ davasında siyasiy taqip alâmetlerini kördi – bu 45% ola.
Terrorizm maddelerine istinaden cezalar devlet hainligi cezalarınen bir oldı, dep qayd ete tedqiqatçılar. Ükümleri belli olğan mahkümlerniñ yarısından ziyadesi 15 yıldan ve ömür boyu apis cezasını aldı, 15 kişige mahkemeler ömür boyu apis cezalarını berdi. Eñ genç mabüs 14 yaşında.