Ukrayina ile sıñırı olğan Rusiyeniñ Kursk, Brânsk ve Belgorod vilâyetlerinde avgustnıñ 10-na keçer gecesi terror ile küreş tedbirleri rejimi ilân etildi.
Rusiye devlet agentlikleri Rusiyeniñ terror ile küreş milliy komitetine esaslanıp haber etkenine köre, bunıñ sebebi «Ukrayina tarafından diversion-terroristik telüke seviyesiniñ artması» ola.
Komitet malümatına köre, terror ile küreş rejimi sebebinden Rusiyeniñ üç regionında «telükesizlikni temin etmek, nizamnı saqlamaq ve obyektlerniñ qorçalavını quvetleştirmek içün qoşma tedbirler» alına.
«Meduza» Rusiye neşiri yazğanına köre, terror ile küreş tedbirleri rejimi vaqtında akimiyetniñ vatandaş ve maşinalarnı tahliye etmek, bağ vastalarını söndürmek, telefon subetlerini kontrol etmek vekâletleri ola, terror ile küreş tedbirleri talap etse, uquq qoruyıcılar, mahkeme qararı olmasa da, mesken ve mesken olmağan yerlerge ve bir de bir obyektlerge kire bile.
Rusiyeniñ Kursk vilâyetinde avgustnıñ 6-ndan başlap Ukrayina ordusınıñ regionğa kirgeni haber etilgen soñ uruşlar devam ete. Ücüm sebebinden avgustnıñ 9-nda vilâyette federal seviyeli fevqulâde vaziyet ilân etilgen edi.
Ukrayina prezidenti Volodımır Zelenskıy reydniñ dördünci kününde cebeniñ bu qısmını ilk sefer ayttı, amma doğrudan aydınlatmadı. Zelenskıynıñ aytqanına köre, o, Ukrayina Silâlı quvetleriniñ baş komandanı Oleksandr Sırskıynıñ «Rusiye Ukrayina topraqlarına ateş açqan topraqlarda Ukrayina mudafaa areketlerine» dair maruzasını diñledi. Zelenskıy tam olaraq angi yönelişler aqqında aytılğanını bildirmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
