Ternopil vilâyetiniñ arbiy memuriyet yolbaşçısı Volodımır Truş bazar künü, aprelniñ 3-nde, Ternopil Rusiye Federatsiyası ordusınıñ ilk ücümine oğradı, dep bildire.
«Tahminen saat 22:20-de duşman Ternopildeki kritik infrastruktura obyektlerinden birini yoq etmege tırıştı. Zarar körgenler yoq», – dep bildirdi Truş Telegramda.
Soñra brifingde o, ücümden soñ obyekt «qullanılmaycaq alda» buluna, dep bildirdi. Truş, ölgenler yoq, çünki akimiyet «aldını aldı», dep ayttı.
Vilâyet arbiy memuriyetiniñ yolbaşçısı şeerniñ angi infrastruktura obyekti aqqında aytıla bildirmedi.
Şeerde olğan patlav aqqında Ternopil şeer yolbaşçısı Serğiy Nadal da ayttı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
