Krasnodardaki Rusiyeniñ umumiy yurisdiktsiya Dördünci temyiz mahkemesi Qırım uquq qoruyıcısı ve jurnalisti Lutfiye Zudiyevanıñ üç yıl evelki yazıları içün berilgen para cezasını lâğu etti. Bu aqta iyülniñ 18-nde "Gratı" neşiri haber etti.
"Mahkeme, polis hadimleriniñ Roskomnadzornıñ adından uquq bozuvları aqqında protokol tizmege aqqı yoq, dep qarar berdi", — dep yaza neşir.
2021 senesi yanvar ayında yazılğan yazılar, Rusiye prokurorları Qarasuvbazar "Hizb ut-Tahrir" gruppasınıñ iştirakçilerinden büyük müddetlerni talap etken mahkeme oturışuvı ve Qırımnıñ farqlı regionlarında olarğa qoltutuv tedbirleri aqqında edi.
Bundan evel Aqmescitteki Rusiye kontrolindeki Kiyev rayon mahkemesi Lutfiye Zudiyevanıñ istinaf şikâyetini red etip, oña para cezasını belgilemege qarar berdi. Zudiyevanıñ adliyecisi Emil Kurbedinov, eger de temyiz mahkemesi aq qorçalayıcığa qarşı qararını deñiştirmese, halqara müessiselerge muracaat etmege niyet etkenini bildirgen edi.
Daa evel belli olğanı kibi, Rusiye tarafından teşkil etilgen Aqmescitteki 10-ncı Halqara mahkemesi Lutfiye Zudiyevanı "kütleviy haber serbestligini qullanğanı içün" 2 biñ rusiye rublesi miqdarında para cezasını berdi.
Fevralniñ 22-nde Canköyde Rusiye quvetçileri jurnalist ve uquq qoruyıcı Lutfiye Zudiyevanıñ evinde tintüv keçirdi. Onı, "Radio Svoboda" malümatını "yabancı agent" olaraq qayd etmeden yayınlağanı içün, "matbuat serbestligini qullanuvda" qabaatladılar. Lutfiye Zudiyeva "Qırım birdemligi" aq qorçalayıcı birleşmesiniñ koordinatorı ola. Martnıñ soñunda Rusiye kontrolindeki Aqmescitteki Kiyev rayon mahkemesi Zudiyevni 2500 ruble para cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
