Rusiye FSB-si cemaat bağları Merkezinde, Rusiye quvetçileri aytqanı kibi, infrastrukturanıñ obyektlerini patlatmağa ve Rusiye memurlarından birine ücüm etmekni planlaştırğan eki Rusiye vatandaşınıñ Aqyarda tutulğanı aqqında bildirdiler.
Haber etilgenine köre, yaqalanğanlar Qırım yarımadasınıñ üç farqlı noqtasından uçurmaq içün dron ve patlayıcı maddelerni alğanlar. Bundan da ğayrı, Rusiye quvetçileri, erkekler Qırımdaki arbiy obyektlerni fotoğa çekip, istihbaratnen oğraşa edi, dep bildirdi.
Erkeklerniñ adları ve soyadları aytılmay. Daa soñra Rusiye FSB-si, Rusiye quvetçileriniñ versiyasını tasdıqlağan, tutulğanlar olaraq kösterilgen, yüzleri körünmegen eki erkekniñ videosını derc etti. Bu video basqı altında çıqarılğan ola bile. Cenk şaraitlerinde FSB versiyasınıñ doğrulığını tasdıqlamaq mümkün degil.
Ukrayina mahsus hızmetleri bu vaziyetke alâ daa cevap bermedi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar RF ordusını "itibardan tüşürüv" içün yaqalana ve memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler. Şimdi FSB bu kibi davalarnı aman-aman er kün aça 2014 senesine qadar ise yılda 10 dava açıla edi.