Berilgen malümatqa köre, yaqalanğan kişi — 2022 senesi faşist timsallerini numayış etkeni içün memuriy mesüliyetke çekilgen 51 yaşındaki Aqyar sakini.
Rusiye telükesizlik hadimleri, yaqalanğan şahıs içtimaiy ağlardaki saifelerinde eki yıldan ziyade "Ukrayinada mahsus arbiy operatsiya keçirilmesi munasebetinen Rusiye Federatsiyası Silâlı quvetleriniñ itibarını tüşürgenini" aydınlattı. O, eki "ayıplama" yazısını yerleştirdi ve farqlı yazılar altında aynı şekilde on dört izaat qaldırdı.
Rusiye quvetçileri erkekke nisbeten Rusiye Federatsiyasınıñ Memuriy cinayetler kodeksiniñ 20.3.3 maddesi ile memuriy protokol tizdiler. Maddeniñ sanktsiyası 30 biñden 50 biñge qadar Rusiye rublesi miqdarında memuriy para cezasını belgiley. Materiallar Rusiye Federatsiyasınıñ nezaretindeki Gagarino rayon mahkemesine yollanıldı.
Ukrayina prezidentiniñ Qırım Muhtar Cumhuriyeti ve Aqyardaki temsilciligi, iyülniñ soñunda ilhaq etilgen Qırımda Rusiye quvetçileri Rusiye Silâlı quvetleriniñ "diskreditatsiyası" aqqında 913 protokol tizgenini bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
