Rusiye ordusınıñ memleket toprağında areket etmesi başqa memleketlerni qasevetlendirmemeli, dep bildire Rusiye kütleviy haber vastaları Rusiye prezidentiniñ vekili Dmitriy Peskovnıñ aytqanlarını, dep haber ete Azatlıq Radiosı.
«Kimse dolaşmadı ve dolaşmay, Rusiye ordusı memleketimizniñ telükesizligini temin etmek içün Rusiye toprağında istegen yönelişte ve şekilde areket ete», – dep ayttı Kreml vekili, ordunıñ Rostov vilâyetinde areket etkenini izaatlap.
Onıñ aytqanına köre, bu «bir qasevet» doğurmamalı.
«Rusiye dünyanıñ iç bir memleketi, hususan Ukraina içün telüke degildir», – dedi Peskov.
Peskov, Rusiye «ordunı istegeni kibi öz toprağı sıñırlarında avuştıra, ve kimse kirişmemeli», dep aytqan edi. Bu şekilde o, Ukraina silâlı quvetleriniñ baş komandanı Ruslan Homçaknıñ Rusiyeniñ «Zapad-2021» strategik talimlerine azırlıq manaçığınen Ukrainanıñ şarqiy sıñırlarına taktik gruppalarını çeke laflarına cevap berdi.
Homçaknıñ qayd etkenine köre, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Aprelniñ 2-nde ABD ve Ukraina prezidentleri Joseph Biden ve Volodımır Zelenskıy telefonda laf etkenler. Beyaz saraynıñ malümatına köre, «prezident Biden ABD, Rusiyeniñ Donbas ve Qırımdaki istilâsı şaraitlerinde Ukraina suvereniteti ve topraq bütünligine qol tutqanını tasdıqladı».
Aprelniñ 4-nde Avropa Birliginiñ tış siyaset ve telükesizlik siyaseti yuqarı temsilcisi Josep Borrell Ukraina akimiyetini Rusiye tarafından yapılğan istilâ vaziyetinde «Avropa Birligi destek köstergenine» işandırdı.
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
