Rusiyeniñ cenkke qol tutqan blogerleri ve cebedeki vaqialarnı nezaret etken telegram kanalları, Kursk vilâyetinde Gluşkovo rayonında Ukrayina Silâlı quvetleriniñ ücüm teşebbüsi aqqında yazalar.
Qayd etilgenine köre, Ukrayina arbiy quvetleri sıñırdan yaqın yerleşken Tötkino köyünde sıñırdan keçmege tırışa. Bazı malümatlarğa köre, ücüm cenübiy-şarqta, Novıy püt meskün yeri civarında etile. Darbeler neticesinde Zvannoye köyünde Seym özeniniñ köprü yıqıldı.
Telegram-kanalları Rusiye arbiyleri qurucılıq maşnalarını ve diger tehnikanı urdı, dep bildire. Yerli kütleviy haber vastaları, öz nevbetinde, Rusiye territoriyasınıñ üzerinde ukrayin uçucısız uçaqlarınıñ faalligini qayd eteler. Kursk vilâyetiniñ gubernatorı vazifesini eda etken Aleksandr Hınşteyn, pilotsız uçaqlarnıñ ücümleri neticesinde üç adam elâk olğanını bildirdi. Onıñ aytqanına köre, eki insan Belov rayonınıñ Şçegolök köyü yanında ve daa biri Gluşkov rayonınıñ Zvannoye köyünde elâk oldı.
Sıñırda yañı uruşlar olğanını tasdıqlağan mustaqil bir malümat yoq. Kıyivde Kursk vilâyetine yañı ücüm aqqında haberlerni izaatlamadılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
