Tataristannıñ Novotroitskoye köyünde Rus gvardiyası mitinglerni dağıtuv talimlerine yerli orta mektepniñ doquzıncı sınıf talebelerini celp etti. Bu aqta Azatlıq Radiosınıñ rus hızmeti bildire.
Mektep binasından çıqarılğan videoda talebeler «qanunsız aktsiyanıñ iştirakçileri» olaraq iştirak etip, politsiya hadimlerine ücüm ete. Rus gvardiyasınıñ hadimleri ücümge qarşı çıqıp, sırağa tizile ve özüni qalqanlarnen qapata, özleri «narazılıq bildirgenlerge» ücüm ete ve olarnı yaqalay.
Mektep talebelerinden biriniñ «MBH media» neşirine aytqanına köre, ne talebe, ne ana-babalarına talimler olacaq, dep evelden haber etilmegen edi. Onıñ aytqanına köre, mektep müdiri talebelerden ders bitken soñ tışarı çıqmalarını rica etti, bundan bir kün ögüne mektep talebelerine sport urbasını kiyip kelmeleri aytıldı.
Mektepniñ özünde jurnalistlerge talimler kerçekten olğanını tasdıqladılar, amma tafsilâtlı bir malümat berilmedi.
