Qırımnıñ işğalden azat etilüvi Ukrayınanıñ diger topraqları azat etilgenine oşaycaq, Rusiye tarafdarı olğan yarımada sakinleri ise onı terk etecek, dep bildirdi Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanov «Raznıye lüdi» («Farqlı insanlar») YouTube-kanalına intervyü berip.
Onıñ fikirince, yarımadada Rusiyege qoltutqan sakinlerniñ büyük qısmı Ukrayına Silâlı quvetleri kelse, Keriç parom keçitinden esas Rusiyege ketecek.
«Kimse Mında qalmaycaq ve Qırım köprü kerekmey, dep tüşünem. Bu topraqnı terk etecekler. Özüni öldürecek degiller, inanıñız. «Rusiye, kel» dep qıçırğanlar, azat etilgen topraqlardan körüne… Qaydalar? Rusiyede. İstisnasız», – dep bildirdi Baş istihbarat idaresiniñ yolbaşçısı.
Ukrayına Mudafaa nazirligi Baş istihbarat idaresiniñ reberi Kırılo Budanov Ukrayına Silâlı quvetleriniñ qarşı ücümine azırlıq «planğa köre kete», amma yerine ketirüv planlarını aydınlatmaycaq, dep bildirgen edi.
Qırımnıñ Rusiye yolbaşçısı Sergey Aksenov Ukrayına fortifikatsiya ve mudafaa sayesinde yarımadanı işğalden qurtarıp olamaycaq, dep ayta.
Mayısnıñ başında Baş istihbarat idaresiniñ vekili Andriy Yusov Qırımda Rusiye memuriyetleriniñ temsilcileri Rusiye işğal etken yarımadanı terk ete, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
