Ukrayina Prezidenti ofisiniñ reis muavini Kırıll Tımoşenko, esirler deñişüvi neticesinde 86 ukrayinalı arbiy azat etilgenini bildidri. Bunı,o, aprelniñ 1-nde haber etti.
"Yançıq deñişüv olıp keçti. 86 ukrayinalı arbiy, olarnıñ arasında 15 qadın artıq telükesizlikte", - dedi o.
Tımoşenkonıñ qayd etkeni kibi, deñişüv aytışuv gruppalarnıñ añlaşması neticesinde olıp keçken.
Deñişüv aqqında Ukrayina baş nazir muavini, vaqtınca işğal etilgen topraqlarnıñ reintegratsiya meseleleri naziri İrına Vereşçuk de haber etti. Onıñ bildirgenine köre, deñişüvni öz buyurığı ile prezident Volodımır Zelenskıy uyğunlaştırğan.
Martnıñ 27-nde Silâlı Quvetlerniñ Baş komandanı Valeriy Zalujnıy, itibardan tüşürüv maqsadınen Rusiye ordusı ukrayinalı arbiylerniñ esirlerge qarşı insaniyetsiz munasebeti aqqında sahte videolar tarqatqanını bildirdi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
