Rusiye mahkemesi tarafından mahküm etilgen qırımlı Appaz Kürtametniñ anası oğlunıñ azat etilmesinde yardım istep, Türkiye prezidenti Recep Erdoğanğa video muracaat yazdı. Video Ayşe Kürtametniñ Facebook saifesinde derc etilgen.
"Oğlum, diger qabaatsız qırımtatar gençleri kibi, yaşlığını Rusiye apishanesinde keçirmesin. Appaznıñ babası Halil de bir yıl soñ apiske alındı ve uydurılğan qabaatlavlar boyunca mahküm etildi", — dedi o.
Qadınnıñ aytqanına köre, olarnıñ evi Rusiye akimiyeti tarafından zapt etilgen, ve şimdi o, uzaqta tuvğanlarınıñ azatlığı oğrunda küreşe.
"Bu küreş menim içün pek qıyın. Bunıñ içün ana olaraq sizge rica etem: maña yardım etiñiz. Şimdi Ukrayina ve Rusiye arasında deñişüvler keçe. Esirler arasında bizim qırımtatarlar da bar. Biz, ukrayin halqı olaraq, sizge pek minnetdarmız, çünki deñişimlerniñ keçirilmesi ve bir çoq esirniñ azat etilmesi tap siziñ sayeñinde oldı. Men Appaz ve babasınıñ da azat etilecegine ümüt etem...", — dep qoştı Ayşe.
Daa evel Türkiye Ukrayina ve Rusiye arasında gumanitar deñişmeler meselesinde, hususan, cenk esirleri ve grajdan reinelerniñ azat etilmesinde aracılıq yapqan edi.
2023 senesi çeçek ayınıñ 20-nde Aqmescitniñ Kiyev rayon mahkemesi 2022 senesi oraq ayında Herson vilâyetiniñ memuriy sıñırından qaçırılğan Appaz Kürtametni 7 yıl sert rejimli koloniyada qalmasına üküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
