19 yılğa üküm etilgen Aluştalı din erbabı Müslim Aliyev endi 1140 künden ziyade ŞİZO-niñ sert şaraitli barakında buluna. Bu aqta "Qırım birdemligi"ne onıñ ömür arqadaşı Naciye Aci-Mamutova bildirdi.
"Müslim 2022 senesi arman ayınıñ 16-ndan berli sert tutuv şaraitlerinde buluna. Bundan ğayrı, onı çeşit müddetlerge ŞİZO-ğa yerleştirgen ediler", — dep tarif etti qırımlınıñ apayı.
Qırımtatarnıñ izolâtornıñ bir kişilik kamerasına yerleştirilmesiniñ bir sebebi, koloniya yolbaşçısı kamerağa kirgeninde, musulman farz namazını toqtatmağanı olğan. Aliyev, ŞİZO-ğa yerleştirilmesine şikâyetini Salavat şeer mahkemesine yollağan edi, amma vaziyet öyle de deñişmedi.
Aliyev 2016 senesi apiske alındı. FSB onı "Hizb ut-Tahrir" islâm siyasiy firqasınıñ faaliyetinde qabaatladı. Teşkilât 2003 senesinden berli Rusiyede yasaq etilgen, amma Ukrayinada qanuniy şekilde faaliyet köstergen edi.
2019 senesi iyülniñ 18-nde Avropa parlamenti Rusiyeni bütün ukrayinalı siyasiy mabüslerni, şu cümleden bu cinaiy davanıñ mabüslerini azat etmege çağıra.
2019 senesi Aliyev Rusiye mahkemesi tarafından 19 yılğa azatlıqtan marum etildi. "Memorial" aq qorçalayıcı merkezi beş qırımlını siyasiy mabüs olaraq tanıdı.