Rusiye tarafından 7 yılğa azatlıqtan marum etilgen qırımtatarı Appaz Kurtamet ile eki aftadan berli bağ yoq. Bu aqta onıñ anası Ayşege atıf etip Qırımtatar resurs merkezi haber ete.
"Eki aftadan berli siyasiy mabüs Apaz Kurtamet ile bağ yoq, bu, onıñ eski apishaneden avuştırılğanını köstere", — dep aytıla haberde.
Qadınnıñ aytqanına köre, mektüpler bir qaç künden soñ barıp çıqa, amma cevap yoq. "Soñki etap bir buçuq ayğa qadar devam etti, bunıñ içün, tahmin etem ki, şimdi de bu qadar vaqıt kerek olacaq", — dep ayta o.
Appaznıñ qayerge avuştırılğanını anası daa bilmey.
"Yazıq ki, etap etüv nasıl şaraitlerde keçkenini bilmeyim. Onıñ mektüplerinde men azmı-çoqmı quvançlı ruhnı oquyım. O, deñişimge ümüt ete, amma anasına mektüpler dostlarına mektüplerden farqlı ola. Sağlıq vaziyeti orta seviyede, Qırım SİZO-sında peyda olğan ten problemi bar. O, yazğanına köre, uzun müddet devamında tedaviylenmese ve ilâcları bitse, ekinci kere tedaviylenmey bile. Bu vaziyette, Qırımğa yollağan bütün ilâclarımıznıñ vaqtında berilmemesi sebebinden problem hronik ola bile. Teessüf ki, Qırım SİZO-sında tibbiy teşkerüvler keçirilmey edi, ve bizler sezgirliknen, mustaqil areket ete edik", — dep bildirdi o.
2023 senesi aprelniñ 20-nde Aqmescitniñ Kiyev rayon mahkemesi, 2022 senesi iyül ayında Herson vilâyetiniñ memuriy sıñırından qaçırılğan Appaz Kurtametni 7 yıl sert rejimli koloniyada qalmasına üküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
