Rusiye Federatsiyasında 12 yıl apis cezasına mahküm etilgen vatandaş jurnalisti Amet Suleymanovnıñ alı Rusiyeniñ Vladimirskiy tsentral apishanesine avuştırılğanından soñ fenalaştı. Bu aqta "Qırım birdemligi" erkekniñ qadını Lilâ Lümanovağa esaslanıp bildire.
Onıñ aytqanına köre, üküm çıqarılmadan evel, Suleymanov ev apsinde bulunğanda, devlet hastahanesine ameliyatqa ketmek içün nevbette turmağa tırıştı. Faqat, qapaqnı deñiştirmege imkân olmadı.
Apishanede Lümanova tibbiy hızmetniñ yolbaşçısı ile aqayına ameliyat yapılacaqmı-yoqmı aqqında laf etip oldı. Qayd etilgenine köre, ekimler Moskvadaki kardiohirurgiya merkezine ameliyat içün muracaat yolladı, amma resmiy tasdıq yoq.
"Eger ameliyat şimdi yapılmasa, yük ekinci yürek qapağına ketecek ve birini degil de, ekisini deñiştirmek kerek olacaq", — dep qayd etti Lümanova.
Bu sene mayısta Suleymanov gipertonik krizi keçirdi. Yüksek qan basımı sebebinden erkekni burun qanaması raatsızlay, sıq-sıq başı aylana. Hronik yürek problemleri qan damarlarına da tesir etti.
"Oña bazı ilâclarnı bereler, bazılarını bermeyler. Oña ne qadar ilâc yollamaq istesem de, müdir oña izin bermegence, o onı alamaz... Men Ametke ömürlik bicillin terapiyası kerek olğanını ayttım - bu kibi tevsiyelerni bizim revmatologımız Ametniñ apishanege kirmesinden evel de bergen edi. Tibbiy bölükniñ yolbaşçısınıñ aytqanına köre, onı apishaneniñ revmatologı baqtı ve bu tedaviylevge ihtiyacı yoq, dep bildirdi", — dep ayta Lümanova.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Suleymanov sağlıq vaziyeti sebebinden üç yıl ev apsinde edi. Jurnalistniñ arterial ve mitral yürek yetersizligi bar, yürek klapanı deñiştirilmeli.
2023 senesi aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
2024 senesi mart ayında Vladimirdeki Frunze rayon mahkemesi Amet Suleymanovnı apishaneden azat etmedi. Onıñ hastalıqları ise apiste tutulmasına mania ola. Suleymanov uquqçılarnen beraber mahkeme qararına istinaf şikâyetini berdi.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
