"Qırım musulmanları davası" boyunca 12 yıl apis cezasına mahküm etilgen qırımtatar siyasiy mabüsi Eldar Kantimirov "milletine duşmanlıq ifade etken, insannı itibardan tüşürgen ve aşalağan çirkin sözler ve laflarğa" muntazam tarzda oğratıla. Bunı "Qırım birdemligi" cemaat birleşmesi haber ete.
Apayı Elvina Üseinovanıñ sözlerine köre, Rusiye Federatsiyasınıñ Ulânovsk vilâyetiniñ Dimitrovgrad şeerindeki 1-nci nomeralı cezahaneniñ müdir yardımcısı Valeriy Nazarkin özüne böyle davranışqa izin bere. Qadın, Rusiye Ceza qanunnamesine binaen bütün mabüslerniñ nezaretçiler tarafından nezaketli munasebet körme aqqına saip olğanlarını qayd etti.
Haber etilgeni kibi, Üseinova apishane hadimleriniñ areketlerine qarşı şikâyette bulunğan.
Rusiye mahkemesi Eldar Kantimirovnı 12 yılğa, Timur Yalkabovnı 17 yılğa üküm etti. Olar Rusiyede yasaqlanğan, amma Ukrayınada ve bir çoq memlekette sıñırsız areket etken «Hizb ut-Tahrir» teşkilâtınıñ faaliyetinde iştirak etkeninde qabaatlana.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
