Rusiyede apis cezasına mahküm etilgen qırımtatar cemaat jurnalisti, arterial ve mitral yürek yetmemezligi hastalığını çekken Amet Suleymanov üç aydan berli yürek yetersizliginden ilâcsız qala, apayı kerekli ilâclarnen yollağan paket Vladimir vilâyetiniñ 2-nci cezahanesine ketirilmegen. Bunı "Qırım birdemligi" cemaat birleşmesi haber ete.
Suleymanovnıñ apayı Lilâ faallerge aytıp bergeni kibi, aqayınıñ bulunğan yerini bilgeninen o ilâclar ile oña paket yollağan. Noyabrniñ soñunda ise yollama keri qaytıp kelgen.
"Trek vastasınen yollamanı közete bildim. Poçtacı onı ketirdi, amma berip olamadı. Bunıñ aqqında bildirme keldi. Bu ilâclar tedaviy içün degil, eñ azından yardımcı bir vasta edi. Ne içün yollama qabul etilmegenini bilmeyim. Ve ilâcsız qalğanını añlağanda, onıñ alını pek qasevet etem", - dep ayttı Lümanov.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
