Rusiyeniñ Tambov vilâyetine uçucısızlar ücüm etti, dep yerli sakinlerniñ malümatına esaslanıp, Rusiye Telegram kanalları bildire. Bu ücüm yerli poroh zavodına yapılğanı aytıla.
Hususan, Shot kanalı yazğanına köre, yerli sakinler Kotovsk şeerinde kökte «motorğa has bir ses» eşitkenler. Uçucısız Kuzmino-Gat köyündeki poroh zavodı tarafına uçqan, dep tahmin etile.
Mash kanalı yazğanına köre, şaatlar uçaq çeşitli «bir qaç uçucısıznı» ve kökte yarıqlarnı kördi.
Rusiye akimiyeti bu ücüm ve onıñ neticeleri aqqında resmiy bir haber derc etmedi. Rusiyeniñ Mudafaa nazirligi 27 dronnıñ «yoq etilgenini» ilân etti: 15-i Belgorod vilâyetinde, yedisi Voronej vilâyetinde, üçü Tambov vilâyetinde, ekisi ise Kursk vilâyetinde.
Ukrayina arbiy komandanlığı da ücüm aqqında haberni izaatlamadı. Aynı vaqıtta sahte malümatqa qarşı küreş merkeziniñ yolbaşçısı Andrey Kovalenko Rusiyede «Tambov poroh zavodına qarşı ücüm birinci kere olmay», dep bildirdi. O, müessiseni Rusiye arbiy-sanayı kompleksiniñ esas obyektlerinden biri dep adlandırdı.
Qırım.Aqiqat muarririyeti bu malümatnı mustaqil menbalardan teşkerip olamay.
Rusiyeniñ Ukrayinağa qarşı büyük ücümi başlağanından berli Rusiye regionları ateş ve dronlarnıñ ücümlerine oğray. Arbiy nişanlarğa ücüm malümatını teşkermek mümkün olsa bile, Rusiyeniñ Mudafaa nazirligi tüşürilgen raketa ve dronlar aqqında haber ete. Kyiv bu malümatnı esasen izaatlamay.
