Udmurtiya Tahqiqat komitetiniñ idaresi ijevskli alim Albert Razinni özüni öldürmege mecbur etüv aqqında cinaiy davanı qapattı.
«Ne vekâletli şahıslar, ne de adiy insanlarnıñ qabaatı tapılmadı», – dep bildire Rusiye müessisesi.
2019 senesi sentâbr ayında Rusiyeniñ İjevsk şeerindeki Udmurtiya Devlet şurasınıñ binası öşünde alim Albert Razin özüni ateşke berdi. O, udmurt qavmini qorumağa talap etti. Razinniñ yanında yazuvlı şiarlar tapıldı, olardan biri – «Yarın tilim yoq olsa, bugün ölmege azırım».
Alim hastahanege kritik alda ketirildi. Onı ilâclarnen yuqlattılar, amma bir qaç saattan soñ Razin can berdi.
Albert Razin 79 yaşında edi. O, felsefe ilimleri namzeti, dotsent, Udmurtiyada nam qazanğan ilim erbabı, «Udmurt Keneş» udmurt milliy areketiniñ iştirakçisi edi.
Razinniñ ölüminden soñ Human Rights Watch aq qorçalayıcı teşkilâtı Rusiye akimiyetini til siyasetini yañıdan baqmasına ve memleketniñ etnik ve til azlıqları rastkelgen «teren tamırlı problemlerni» al etmesine çağırdı.
