Qırım ve Aqyardaki Rusiye Tahqiqat komitetiniñ idaresi bir yıl evelsi ğayıp olğan ve yaqınlarda Bağçasaray rayonında cesedi tapılğan qırımtatarınıñ ölümi öldürüv degil, dep bildire. Bu aqta Qırım kütleviy haber vastaları müessiseniñ matbuat hızmetine esaslanıp bildire.
«Yaşnıñ ölüminde cinayet alâmetleri körünmey, öldürüv izleri yoq», – dep bildirdi Tahqiqat komiteti Qırımnıñ Rusiye akimiyetine yaqın olğan «Krıminform» saytı.
Tahqiqatçılarnıñ malümatına köre, Eynar Eyupov özüni öldürmek istegenini bir qaç kere aytqan edi, anasınıñ ölümine pek yanğan edi.
Qırım Tahqiqat komiteti ve diger uquq qoruyıcı organlarınıñ saytlarında resmiy malümat daa yoq. Elâk olğannıñ tuvğanları bir şeyni izaatlamadı.
Sentâbrniñ 16-nda belli olğanı kibi, Bağçasaray rayonınıñ Zalanköy (Holmovka) köyü yanında ğayıp olğan qırımtatarı Eynar Eyupovnıñ cesedi tapıldı.
2018 senesi avgust ayında haber etilgeni kibi, Bağçasaray rayonınıñ Büyük Qaralez (Krasnıy mak) köyünde 1998 senesi doğğan qırımlı Eynar Şevketoviç Eyupov ğayıp oldı.
