Qırımdaki Rusiye tahqiqatı Novıy mir köyü sakini İsmail Ramazanovğa qarşı cinaiy işni qapattı. Bunı advokat Aleksey Ladin noyabrniñ 7-nde Qırım.Aqiqat mühbirine bildirdi.
Onıñ aytqanına köre, laf patronlarnıñ qanunsız saqlanması aqqında (Rusiye Ceza kodeksiniñ 222-nci maddesiniñ 1-inci qısmı) kete.
«İsmailge qarşı açılğan 24 patronnı saqlav boyunca cinaiy iş cinayet qayd etilmegeni içün qapatıldı. Tahqiqat, bu patronlarnıñ İsmailge ait olğanını isbatlamadı. İmaye böyle neticege razı», – dedi advokat.
Onıñ aytqanına köre, Ramazanovnıñ evinde keçirilgen tintüv vaqtında tapılğan kibi qayd etilgen patronlar Ukraina zavodında işlep çıqarılğan edi.
«Bu patronlar öz vaqtında, 2014 senesinden evel, Qırımdaki Ukraina telükesizlik hızmetine ketirilgen edi, soñra ise FSBge «miras olaraq» keçti. Böylece, olar Ramazanovğa qoyulğan edi», – dedi Ladin.
Advokatnıñ qayd etkenine köre, mabüsniñ ekstremizm teşviqatı aqqında (Rusiye Ceza kodeksiniñ 282-nci maddesi) cinaiy işi açıq qala.
«Bu cinaiy işni qapatmağa rica etken edim, amma tahqiqat razı olmadı», – dep qoştı o.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
Avgustnıñ 2-nde belli oldı ki, Ramazanovğa qarşı cinaiy iş qoşma tahqiqatqa qaytarıldı.
