Rusiye tahqiqatçısı silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovğa qabaatını tanıp, SİZOda qaluv sıñırlav tedbiri yerine ev apsine ketmege teklif ete. Bu aqta Bekirovnıñ advokatı İslâm Velilâyev Qırım.Aqiqat mühbirine bildirdi.
«İmaye ekspertizalarnen tanış olğanda tahqiqatçı Bekirovğa kene qabaatını tanımağa teklif etti. Qabaatıñnı tanısañ – birden ev apsi. Edem ağa bir şey yapmağanını ve ömründe iç bir kere o qadar silâ körmegenini tekrarladı. Men advokat olaraq tahqiqatçıdan qabaat tanılsa ne olacaq, dep soradım? Tek qabaat tanıması yeterli degil. İleride olar liderlerimizniñ adlarını sımarlağanlarnıñ adları kibi aytmağa talap etecekler», – dedi Velilâyev.
İyünniñ başında qabaatlayıcı tarafnıñ Bekirovnı SİZOda tutuv müddetini uzatmaq muracaatı baqılacaq. Tahqiqatçı bunıñ kibi muracaatlarda «bir sıra tahqiqat tedbiri keçirilecegine» esaslana.
Advokatnıñ qayd etkenine köre, tahqiqat yekünlenmekte, faqat tahqiqatçı Bekirovnıñ apis müddetini uzatmaq içün sebep olsun dep, qalğan tahqiqat tedbirlerini aselet uzata.
«SİZOda qaluv müddeti soñuna kelmekte – tahqiqatçı bir de bir tahqiqat tedbirlerini keçirmey, esnas sozula. Ümüt etem ki, bu sefer mahkeme bizni eşitip, Edem ağanı ev apsine avuştırır. İmaye öz tarafından buña kerekli olğan bütün areketler yapa», – dedi Velilâyev.
Al-azırda Rusiye tahqiqatçısı Bekirovnıñ davasınen bağlı açıq izaat bermey.
Daa evel mayısta qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.
Aprelniñ 26-nda Rusiye kontrolindeki Qırım Yuqarı mahkemesi Bekirovnıñ imayesi bergen şikâyet arizasını red etti. Edem Bekirov iyünniñ 12-ne qadar SİZOda qalacaq.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
